ವಾತ್ಸಲ್ಯ
---------

ಹಾಲುಣಿಸಲು ಮೊಲೆಯೊಡ್ಡಿದವಳ
ಸೆರಗ ಮರೆಯಲಿ
ಕಣ್ಣಾಮುಚ್ಚಾಲೆಯಾಡಿತ್ತು ಕೂಸು
ವಾತ್ಸಲ್ಯದಲಿ ಮೈಮರೆತು ಅರಳಿ
ಹೂವಾಯ್ತು ತಾಯ
ನನೆಯ೦ತಿದ್ದ ಮನಸು

ಭಾಸ್ಕರನ ಸೇವೆ
--------------

ಮನುಜ ಮನದ ಶೂನ್ಯ ತೊಡೆಯೆ
ಮೂಡಿತೊ೦ದು ಬೆಳಕಿನ ವಿನ್ಯಾಸ
ಜಗದೆಲ್ಲ ಜೀವರಾಶಿಗಳ ಒಳಿತಿಗಾಗಿ
ನಿತ್ಯ ಜ್ವಲಿಪ ಭಾಸ್ಕರನಿಗೆಲ್ಲಿ ಆಯಾಸ ?

ಇರುವುದನೇ ಬಳಸಿ
----------------

ಕ೦ಪು ಕಡಿಮೆಯಾದರೇನು ?
ಗುಲಾಬಿಯು ತಾ
ತನ್ನ ಕೆ೦ಪಿನಿ೦ದಲೇ ಕಣ್ಮನ
ಸೆಳೆಯದೇನು ?

ದುಡುಕಿನ ಫಲ
------------

ಒಮ್ಮೆ ಎಡವಿದರೆ
ನಮ್ಮ ನಡೆ
ಬದುಕಿಗಪ್ಪಳಿಸುವುದು
ವಿಷದ ಹೆಡೆ
ತಾನೊ೦ದು ಹುಚ್ಚು
ಕುನ್ನಿಗೂ ಕಡೆ
ನಿ೦ತು ಕೂರಲೂ ಸಿಗದು
ನಮಗೆಲ್ಲೂ ಎಡೆ

ನಲ್ಲೆ, ನಲ್ಲಗೆ
-----------

ನಲ್ಲ ನಿನ್ನ ಒಲವ ಬೆಳಕು
ಪ್ರಥಮದಲ್ಲಿ ತಾಕಲು
ಹೂವಾಯಿತೆನ್ನ ಹೆಣ್ತನದ ನನೆ
ನಿನ್ನ ಪ್ರೀತಿ ಮು೦ಗಾರಿಗೆ
ಹಸಿರುದಯಿಸಿ ಉಸಿರಾಡಿತು
ನಲಿಯಿತೆನ್ನ ಮನ